Há­teigs­veg­ur 59

Verkefnið Háteigsvegur 59 er 500 m2 staðsteypt fjölbýlishús á þremur hæðum við Vatnshólinn og Stýrimannaskólann í eigu Félagsbústaða. Húsið er búsetukjarni fyrir fatlaða en gert er ráð fyrir 8 íbúðum í húsinu, þar af einni fyrir starfsfólk. Um er að ræða þróunarverkefni en markmiðið er að lækka kolefnisspor framkvæmdarinnar að lágmarki um 30% miðað við viðmiðunarhús. Annað markmið verkefnisins er að lágmarka notkun byggingarefna almennt og eftir fremsta megni að nota úrgangsefni eða afskurð sem annars hefði verið sendur í urðun eða í orkufrekra niðurvinnslu í stað nýrra efna þar sem það er möguleiki. Við val á efnum og útfærslum var notast við lífsferilsgreiningar samhliða hönnun hússins. Byggingin hefur í gegnum það ferli verið borin saman við viðmiðunarhús til þess að sjá hversu mikið er hægt að lækka fótspor byggingarinnar með einföldum aðgerðum. Þróunar- og nýsköpunarvinna tengd verkefninu hefur snúist um hvernig hægt er að nota afgangs- og úrgangsefni sem byggingarefni og hefur það krafist þverfaglegrar vinnu við rannsóknir, greiningar og samræmingar samhliða hönnun sem er ný aðferðarfræði við hönnun mannvirkja á Íslandi.