Síðan Vegvísir HMS að breyttu byggingareftirlit var gefinn út í maí 2025 hefur stofnunin átt mörg góð og upplýsandi samtöl við hina ýmsu hagaðila. Í október og fram í desember 2025 hélt HMS svo fimm vinnustofur vegna tillagnanna með fulltrúum hagaðila.

Markmið HMS með vinnustofunum var að sjónarmið þátttakenda og samtal á hverri þeirra yrði eins þverfaglegt og kostur var með það að leiðarljósi að draga fram ólíkar áskoranir en ekki síður tækifæri í hverjum landshluta fyrir sig.

Til að ná þeim markmiðum óskaði HMS eftir tilnefningum frá samtökum eða fulltrúum hagaðila um einstaklinga með ólík hlutverk innan mannvirkjageirans til að taka þátt í vinnustofunum. Þeir flokkar hagaðila innan mannvirkjageirans sem horft var til svo unnt væri að ná breiðu samtali á vinnustofunum voru hönnun, framkvæmd, eftirlit og stjórnvöld.

Á vinnustofunum var farið yfir þær tillögur vegvísisins sem sneru að áhættumiðuðu ytra eftirliti í höndum óháðra skoðunarstofa í stað byggingarfulltrúa og jafnframt niðurlagningu á hlutverki byggingastjóra. Tillögunum er í grunninn ætlað að draga úr byggingargöllum og auka neytendavernd.

Fyrirkomulag hverrar vinnustofu var með þeim hætti að í upphafi kynnti HMS forsendur og umfang breytinganna sem tillögurnar fela í sér. Þátttakendum var skipt í þverfaglega hópa og fékk hver og einn í kjölfarið tækifæri til þess að koma skoðunum sínum á framfæri. Um leið gafst fólki kostur á að heyra sjónarmið annarra hagaðila innan mannvirkjageirans gagnvart fyrirhuguðum breytingum. Hóparnir kynntu vinnu sína í lok hverrar vinnustofu og sköpuðust þá uppbyggjandi umræður um niðurstöður hverju sinni.