Enn hafa fáar íbúðir selst með sameignarfyrirkomulagi, en fermetraverð þeirra íbúða sem hafa selst með því fyrirkomulagi hefur ekki verið frábrugðið öðrum sambærilegum íbúðum. Þetta er á meðal þess sem fjallað verður um í mánaðarskýrslu HMS fyrir júlímánuð sem kemur út í næstu viku.

Kaup­samn­ing­ar í maí voru færri en und­an­far­in ár

Þinglýstir kaupsamningar um íbúðarhúsnæði voru 780 í maí síðastliðnum. Það eru færri kaupsamningar en í sama mánuði undanfarin tíu ár, ef frá er talið árið 2023 þegar 731 kaupsamningi var þinglýst.

Tæplega 62% þinglýstra kaupsamninga í maímánuði vörðuðu íbúðir sem staðsettar eru á höfuðborgarsvæðinu sem er í samræmi við dreifingu íbúðastokksins eftir landsvæðum. Þinglýstum kaupsamningum fækkaði þó um 5% á milli mánaða á höfuðborgarsvæðinu á sama tíma og þeim fjölgaði um 17% í nágrenni höfuðborgarsvæðisins og um 12% annars staðar á landsbyggðinni.

Út­breiðsla sam­eign­ar­fyr­ir­komu­lags er enn tak­mörk­uð

Tíu mánuðir eru nú liðnir frá því að svokallað sameignarfyrirkomulag var fyrst kynnt til sögunnar hér á landi. Þar bjóðast fjárfestingasjóðir á vegum byggingarfyrirtækja til að taka þátt í kaupum einstaklinga á nýjum íbúðum úr eigin smiðju byggingaraðilanna. Útbreiðsla fyrirkomulagsins er enn takmörkuð en í upphafi júlímánaðar áttu fimm fjárfestingasjóðir á vegum byggingaverktaka hlut í 44 íbúðum á höfuðborgarsvæðinu.

Flestar íbúðirnar eru staðsettar í Garðabæ (43%) og í Hafnarfirði (41%) auk nokkurra íbúða í Reykjavík (16%). Einungis nýjar íbúðir standa kaupendum til boða með sameignarfyrirkomulaginu, en meirihluti íbúðanna sem fjárfestingarsjóðirnir eiga hlut í er með byggingarár 2025. Aðrar íbúðir eru með byggingarár 2023, 2024 og 2026.

Meirihluti íbúðanna eru á bilinu 70 til 99 fermetrar að stærð en fimmtungur þeirra er á bilinu 100 til 129 fermetrar, líkt og sjá má á myndinni hér að neðan. Lítill hluti íbúðanna er minni en 70 fermetrar að stærð og enn færri eru 130 fermetrar eða stærri.

Kaup­verð sam­eignar­í­búða á pari við aðr­ar sam­bæri­leg­ar íbúð­ir

Kaupverð íbúðanna sem sameignarsjóðirnir eiga hlut í hefur verið á bilinu 59 til 119 milljónir króna, en meðalkaupverðið hefur verið um 79 milljónir króna. Fermetraverðið hefur verið allt frá 680 þúsund krónum upp í tæplega 1.100 þúsund krónur, en helmingur íbúðanna voru keyptar á fermetraverði á bilinu 900 til 999 þúsund krónur, líkt og sjá má á myndinni hér að neðan. Um 28% íbúðanna voru keyptar á fermetraverði á bilinu 700 til 899 þúsund krónur en einungis lítill hluti á fermetraverði undir 700 þúsund krónum eða yfir milljón krónum. Miðgildi fermetraverðs er rúmlega 920 þúsund krónur.

Heilt á litið hefur meðalfermetraverð þeirra íbúða sem sameignarsjóðirnir eiga hlut í verið á pari við meðalfermetraverð í kaupsamningum um sambærilegar íbúðir síðastliðið ár, þ.e. fjölbýlisíbúðir með byggingarár frá 2023 til 2026 í Reykjavík, Hafnarfirði og Garðabæ. Í kaupverðsjá HMS má nálgast upplýsingar um kaupsamninga úr kaupskrá auk samantekinna upplýsinga um fjölda kaupsamninga og miðgildi fermetraverðs eftir mánuðum.